Romriis - 15. bis 17. Juni 2017

Sechs junge Frauen, die Jugendseelsorgerin Andrea Neuhold (Juseso) und der Jugendseelsorger Valentin Rudaz (Sense Mitte) reisten vom 15. bis 18. Juni zusammen nach Rom. Den folgenden Bericht haben die Mädchen gemeinsam geschrieben.

6 jungi, unerfahreni, tüuwis nit ganz justi Mädis hi sich am Donnstig 15. Juni z Fryburg versammlet um sich ùfe Wäg nach Rom zbegä. Nanera underhautendi ù luti Zugfahrt (üsi gueti Stömmig isch de andere Mitfahrer flingg ufgfalle) simer entlich z Rom a cho. Nai simmer mit üsùm ganze Bagasch dür Rom tschaupet, bis mer entlich bi üsùm Underkünftli a cho sin. Dena simer t’Umgäbig ga uskundschafte. Z’Nacht simer imena chline Peizli gsi, chli abgläge vo au däne Turischte. A feini Gelati ù a Granita si de krönenda Abschluss vom Tag gsi.

2.Tag: Nachom Ischtig i de Chùucha simer los gschländeret zum Vatikan. Det himer üs zersch müsse astänig aalege, will mer wäge die Hitz z`chùrzi Sache aghäbe hii für i t’Chùucha. Nach hunderte vo Stägetritte, a riese Hitz ù vöü gfächer simer entlich ùfom Petersdom obe glandet ù hi di wunderschöni Ussicht vo Rom chene gniesse. Ùfom Tach himmer du o erfahre was di Chùucha mitùm Petrus ztüe het. Aus ob de Wäg nit scho aschtrengend gnue gsi weri, simer nai ono ina Hügù wuy ga Picknicke. Nachera chlini „Abchüelig" simer nai zu de Tiber-Insla gange. Na däm himer i üsùm Zümmer a chlini Siesta gmacht. Z`Nacht simer imana chline Peizli gsi mit sehr charmante Chäüner (seeehr charmant).

3.Tag:  Am Samstigmorge hiimer ummi a chlina „Input" i de Chùucha becho. Jeda Morge himmer üsers Chrüpumünz zäme ramisiert ù eper bestümmt, wa de Bätler a chlina Zuestupf cha gä. Üsa Plan für dä Tag weh igendlich d Besichtigung fade Katakombe gsi. Aber Italie hets nit so mit um ÖV. Nach 45 Minute warte, gfüuti 3 Schtune a de pralli Hitz, himmer du de doch t`Hoffnig ufgä u si zum Kapitol wuy tschaupet. Aschliessend simmer am Forum Romanum verbii bis zum Mensche umringte Colloseum glüffe. Inera Strass, irgendwo i de nöchi vam Colloseum, himmer üsers Picknick wouverdient gässe. Wilmer gingno chli Hoffnig i t`Busse ghäbe hi, himers nomau probiert. U as Wunder! As het sogar klappet. Um üs alli no chli z‘erhole himmer a chlini Siesta gmacht. Top erhout ù fit (usser üser Füess wo no weh ta hi), simmer nai ùf Shoppingtour gange. Aber devor himmer no di Spanischi Träppa besichtiget ù natürlich no as Selfie deva gmacht. Will alli musdüri si gsi, himmer üs entschide i das Beizli grad vor de Unterkunft z‘gah. Us Abschluss hets nomau a feini Glaca gä. Gmüetlich simmer no chli i de Gässleni ù ufom Piazza Navona umagschländeret ù hi de lötscht Abe la usklinge.

4.Tag: Wi a de andere Morge, simmer ùmi i t`Chùucha gange um üsi täglichi Inschpiration zgfüne. Ùs Adeiche a di schöni Zyt in Rom, himer as Armbändeli bercho. Dena himer di lesche Souvenir bsorget. Nachara feini Glaca (epa di 10ti a däm hiise Wuchenend) himer üser packte Koffere packt ù hi üs va üsùm Unterkünftli verabschiedet. Mitum Zug simmer bis ùf Mailand. Natürlich simmer o i dem Zug nit unbemerkt blöbe. In Mailand simmer de berüemta Mailänderdom ga besichtiget ù hi di räschtlichi Zyt mit ùmaschnouse i türe Läde vertrübe. Schlùssendlich himer entgütig de Zug i üsers schöna Himatli (Schwiz) gno.

Wir hi wunderschöni Momente ds Rom erläbt. As isch a unvergässlichi Riis gsi  ù wir glube das würd üs aune i Erinnerig plibe! Wir his ifach alli o zäme so guet mitenand ghäbe, hi föü glachet ù wis epa ging isch, wettemù am liebschte no as paar Tage meh plibe. Aber äbe, wis a so schön hisst: „Ma muess denn ga, wes am schönschte isch!"

Amandine, Christelle, Elena, Léane, Melanie, Rahel


               
/simplegalerie/2017-03Romreise